香港近幾十年都一直被評為全世界生活成本最高嘅城市之一。隨著樓價不斷上漲，好多年輕人都會選擇喺香港租屋，而放棄置業買樓，等自己可以早啲達成擁有自己Dream House嘅夢想。不過對於好多初次租屋嘅人嚟講，要租一間啱心水嘅屋真係好難，一個唔小心做到間「伏屋」仲要比合約綁住至少一年以上，都真係幾大鑊。為咗解決新手嘅租屋迷思，MZ Credit今次預備咗個懶人包俾新手學識點樣輕鬆租屋之餘，又知道有咩伏位要多加注意！
1. 邊到搵樓好？
係香港你可以用2個方式去租屋，一係就搵香港嘅牌照房地產中介公司（agent）或Online租屋平台租屋，一係直接向業主租屋。
普遍新手我哋都會建議去搵Agent租屋，因為佢哋會根據你要求幫您篩選合適嘅單位，同埋幫你同業主溝通，解決好多瑣碎雜項。不過搵Agent你就要比返佣金（中介費用），一般都會係半個月租金左右。如果想慳返啲佣金，有租屋經驗嘅人都會去社交平台（Facebook、Carousell 等）去搵屋，之後直接約業主睇樓，但係租屋個陣就要自己處理返繁複嘅手續。
2. 揀咩屋好？
係租屋嘅時候，你除咗需要考慮價格、區域、交通配套同設施等因素外，唔同類型嘅樓都會有特別嘅注意事項（例如唐樓、私人屋苑、村屋都有唔同「雷點」要考慮，所以一定要問清楚合約或者大廈規條）。另外，近年好多人都會想租屋之後想養寵物，咁你就一定要睇清楚屋苑政策（例如舊式屋苑係唔可以養狗等）。
3. 睇樓有咩地方要留意？
睇樓嘅時候，除咗留意樓盤嘅配套外，仲記得一定要仔細檢查房屋設施和維護情況，例如睇下有無潮濕滲水或衛生問題。此外，仲可以留意下鄰居嘅情況。例如會唔會有噪音或者亂放雜物等。
揀啱心水樓，不妨Google下睇下單位係唔係凶宅。如果擔心之後會有拗撬的話，亦都建議可以須搜索土地等級冊(https://www2.iris.gov.hk/eservices/common/selectuser.jsp)，確認房屋的注冊所有者和所有權，以免詐騙。你可以通過土地登記簿的櫃台服務或自助搜索服務進行搜索，每次搜索費用為港幣10元。。
想做多步保障自己利益，記得係簽約前就要確保業主已經有銀行嘅「出租同意書」（確保業主可以係按揭期間出租單位）。如果唔係銀行收回物業個陣，租客有機會被逼遷。
4.問清楚租金以外有咩雜費
一般嚟講，租金通常包括管理費同政府稅，而租客就需要自行繳付責水、電和煤氣費用。不過有機會有啲細嘅雜費係要租客負責返，例如屋內裝修維修費用，呢啲睇樓前記得問清楚，都簽約時都記得要係條款列明呀！
