上一篇講完睇樓有咩要注意嘅事項，今次就會集中講番簽約前同搬屋前要留意嘅「伏」位，等你可以安心咁搬入去住
簽約租約之前要留意嘅事
租期：係香港租屋一般租期為2年，第一年係固定租期協議（死約），第二年係週期性租期協議（生約）。如果第一年想提前終止租約，租客係需要賠返錢俾業主架！而你係第二年有預留足夠嘅通知期通知業主解約嘅話，租客就可以攞返按金。
簽約文件：一般情況下都需要，香港身份證、足夠的現金（交返按金之類）同收入證明的副本（例如薪水單，工作證明等）。房東和租客簽署合約後，雙方都會keep返租約嘅副本作為記錄。
免租期: 一般而言，業主會係開始租約時提供3至7天的免租期，等你搬遷同進行小裝修。來可以直接同業主或agent協議。
按金和預繳租金：係香港租樓，一般都會收取俗稱「兩按一上」，即租金兩個月按金，第一個月租金。如果你有請agent，仲需要比多半個月租金作為佣金。
以13,000港元的租金為例，開支如下：
按金（2個月租金）：26,000港元
預付租金（1個月租金）：13,000港元
Agent佣金：7,500港元
最初開支為46,500港元。
搬屋之前要留意嘅事
記錄入住前環境：為咗減少紛爭同順利拎得返按金，租客係搬入之前記得要影低全屋每個角落，以避免不必要衝突。如果屋企係配有家具／電器，都要影低佢哋！入住之後覺得屋內有啲嘢唔合心，想裝修之前記得要問聲業主，唔好私下改動呀！
抄錶：由於大部分租約係唔包水電煤，所以要了解清楚水費、電費計算方法，同埋入住前可以抄低當時度數作為參考。若過單位嘅錶位係同人Share，就要記得每月抄一次錶，發現用量有異常就要向業主提出。
購買家庭保險：租客要保障自己財產的話，記得要買家庭保險，因為業主買嘅家庭保險未必保埋你個份。
